Zeta Aromátiko di Tea Tree

E benefisionan di salu di e zeta di Tea Tree por wòrdu atribuí na su kalidatnan di ta kontra bakteria, mikrobio, antiséptiko, antivirus, balsamiko, sikatrisante i otro nan.

Kontrali di loke e nòmber ta indiká, zeta di tea tree no ta ekstra’é for di e mata ku normal ta asosiá ku te. Ni tampoko e no ta ekstra’é for di e simia di e mata di te. Al kontrario tea tree ta ekstra’é pa medio di destilashon di stöm for di e blachinan i takinan di tea tree ku tin e nòmber botániko Melaleuca Alternifolia. E mata di tea tree ta nativo di Australia i e zeta ta masha usa i konosí bou di e prome habitantenan di e kontinente komo un remedi pa kura tur malesa i malestar for di den tempunan di antaño.

E reputashon di tea tree komo un remedi ku ta kura tur malesa no ta eksagera mirando ku tea tree por wòrdu usa pa kura mayoria infekshon i malesa tropikal. E kalidatnan magiko di ta kura i desinfekta ta hasi’é un remedi maravioso ku ta boost bo sistema immün. Pero tene kuenta ku e no ta un zeta pa bebe i ta venenoso. Tea tree ta solamente pa uso topikal/eksterno.

Uso Terapéutiko

Kontra bakteria i mikrobio

Ta wòrdu bisa ku na momento ku Mama Tera krea malesanan, na mes momento tambe e ta krea su kura. Den e aria trópiko mikrobio, virus, skimel i bakteria ta mas aktivo, i esei ta nifika ku ta den e arianan ey mes bo ta haña e mata of yerbanan di medisina pa trata e malesanan aki. Heridanan ku por kontra’é infekshon di bakteria por wòrdu trata efektivo i protega ku e zeta di tea tree.

Boost

E zeta di tea tree en general ta boost nos salú i bienestar. E ta promove apsorpshon di nutriente from di nos kuminda i ta duna protekshon kontra di malesanan kual ta un adishon positivo na nos bida.

Sikatrisante

E karakterístika sikatrisante di tea tree ta hasi ku e ta kura herida lihe i ta protega kontra di infekshon. Tambe e ta neutralisa i minimalisa marka i manchanan ku ta keda atras dor di acne, sende paga i otro nan.

Antiviral

Infekshonnan viral sa ta peligroso i ta sosode regular. Un virus por soporta temperatura nan ekstremo, friuw i asta venenu, dor ku nan ta krea un kapa, ‘Cyst’, pa protekshon rònt di nan. Tin virus nan ku ta inteligente i ta krea un cyst nobo kada bes ku nan wòrdu aktiva, manera e virus komun di ferkout pa asina engañá nos sistema immün. Nan por wòrdu elimina solamente si e cyst wòrdu kibra pa medio di sierto komponente. Zeta di tea tree ta yuda kibra e cyst di sierto virus nan i ta duna protekshon kontra di nan. Tambe e ta yuda kura infekshon nan viral manera ferkout, grip, sarampi i sende paga.

Saka slèim

Persona nan ku ta sufri di ferkout i tosamentu, kongestion, brònkitis, i otro malestar asosia ku ferkout sigur ta haña un alivio dor di usa zeta di tea tree. Por meskla e zeta di tea tree den un zeta basiko i hunta esaki riba e pechu i tambe por inhale durante ku ta drumí. Poniendo un dròp riba kusinchi pa e por hasi su magia durante ku ta drumi anochi i bo ta lanta mainta hopi mas miho. Banda di esakinan tambe ta masha bon pa difüs e zeta den kamber voral ora muchanan tin ferkout. Tene kuenta si ku e ta un zeta sterki i ku no mester usa di mas ku muchanan chiki of beibi.

Kuido di Kabei

Su karakterístika stimulante ta masha benefisioso pa kuida sierto kondishon nan di nos kabei. Si bo ta sufri di kaspa of kabei ku ta kai, aplika un tiki di e zeta di tea tree mesklá den un zeta basiko den kueru di kabes. Lo bo eksperensia ku e sirkulashon di sanger lo subi i esaki ta hasi e ‘follicle’ di e kabei ta bira mas salú i ta hasi bo kabei mas fuerte ku ta pone ku bo no ta sufri di kaida di kabei prematuro.

Insektisida

Ta opvio ku un zeta aromátiko ku ta asina efektivo kontra di bakteria i virus tambe ta efektivo kontra di insekto. Zeta di tea tree ta un ‘deterrent’ di insekto efektivo i ku ta mata insekto. E no ta laga parasito i otro insekto nan manera muska, sangura i pieu yega serka un persona ku a hunta su kurpa ku tea tree. Tambe e ta mata insekto i bichi interno dor ku e zeta ta wòrdu apsorbe dor di bo kurpa i kueru.

 

Koutela i kontra-indikashon

Kòrda ku tea tree no ta pa bebe. Warda e zeta un kaminda ku mucha chikitu i beibi no por yega. En general zeta di tea tree ta sèif pa usa i den mayoria kaso no tin efektonan sekundario. Pero un persona ku tin un kueru delikado por eksperensia un reakshon. Tene e zeta leu for di wowo, lens, parti interno di nanishi, i partinan delikado di bo kueru. Semper agrega zetanan aromátiko na un zeta básiko prome ku usa na kurpa.